الوَالْدِين

 رُدْ بالِكْ الوَالْدِينْ

لا اتْوَجَعْهُمْ

إباتْ بُوكْ حزِينْ

عيُونَه رُدْ بالِكْ إدَمَعْهُمْ

غُدْوَة إفارْقُوكْ

تِتْمَنَى لَحْظَة

 معاكْ إتْرَجَعْهُمْ

إتْباتْ نادِمْ إتْنِينْ

حَتَى في لمْنامْ تِسْمَعْهُمْ

رُدْ بالِكْ

 إغُرِّكْ الزِينْ

إمشِي طرِيقْهُمْ تَبَعْهُمْ

إحْذِرْ إتْوَجَعْهُمْ

كُونْ لِيهُمْ صَدِرْ حنِينْ

إحْمِلْ حتَى عَوَجْهُمْ

و اطْبايَعْهُمْ

ضَحُوا عَلِيكْ سنِينْ

اضْوَا طرِيقِكْ بِصْوابَعْهُمْ

رُدْ بالِكْ تَنْساهُمْ

 و اتْضَيَعْهُمْ

حُطْهُمْ فِي العِينْ

فِي كُبُرْهُمْ لا اتْهَمِلْهُمْ

لا اتْجَوَعْهُمْ

نِسيتْ أمِكْ

كُنِتْ في بَطِنّها جنِينْ

عَدِتْ شُهُورْ الحَمِلْ

 و وُجايَعْهُمْ

اليُومْ تِخْسِرْ عَلِيها كِلِمْتِينْ

ساعاتْ قِلِيلَة بِيكْ تِجْمَعْهُمْ

رُدْ بالِكْ

تَقْسَى عَالوَالْدِينْ

كُونْ سَنَدْهُمْ بِالمَحَبَة شبَعْهُمْ

مَتَنْساشْ

عَنْدِكْ دُيُونْ

خَلِصْهُمْ و رَجَعْهُمْ

إكُونُوا علِيكْ راضِينْ

إسْمَعْهُمْ و طاوَعْهُمْ

المُوتْ قرِيبَة كُلْنا راحْلِينْ

لا اتْكونْ غلِيظْ إدَمَعْهُمْ

كانْ نادُوكْ أعْزِمْ فِي الحِينْ

كُونْ حاضِرْ لا تنازَعْهُمْ

حَتى لَوْ غالْطِينْ

بوِسِعْ البالْ تُقْنَعْهُمْ

قُدامْ ربي العالَمِينْ

يِشفْعُولِكْ بطابَعْهُمْ

تِمْشِي معَ الفالْحِينْ

الجنّة بِيكْ تِجْمَعْهُمْ.